Ġranet tal-Enerġija 2015: Inġibu l-enerġija sikura, nadifa u effiċjenti iktar qrib tagħna
Il-Ġranet tal-Enerġija tal-Unjoni Ewropea qed jgħinu sabiex tinxtered il-kelma dwar enerġija sikura, nadifa u effiċjenti. Sa 500 preżentazzjoni, workshops, esebizzjonijiet, kunċerti, logħob, kwiżżijiet, wirjiet u attivitajiet oħrajn huma mistennija li jattiraw eluf ta’ viżitaturi fl-Ewropa u lil hinn minnha. Kważi kwart ta’ dawn l-avvenimenti se jsiru fi Brussell madwar il-Ġimgħa Ewopea għall-Enerġija Sostenibbli (EUSEW) u l-Konferenza dwar il-Politika, filwaqt li l-bqija se jiġu organizzati f’Ġunju f’lokalitajiet imxerrda madwar it-28 Stat Membru tal-UE u pajjiżi assoċjati, inklużi t-Turkija, is-Serbja, il-Moldova, il-Ġeorġja, l-Ukrajna, in-Norveġja u l-Islanda.
Kumpaniji privati, awtoritajiet pubbliċi, aġenziji tal-enerġija, NGOs, il-kmamar tal-kummerċ, l-assoċjazzjonijiet tal-industrija u tal-konsumaturi, il-midja, l-istituzzjonijiet edukattivi, iċ-ċentri tar-riċerka u t-teknoloġija kollha ffirmaw biex jospitaw l-avvenimenti kalendarji eċitanti ta’ din is-sena.
Skopri l-Ġranet tal-Enerġija li qed iseħħu ħdejk – jew saħansitra aħjar, ipproponi l-ġranet tiegħek!
L-isfond: iktar minn ġurnata u anke Ġimgħa
Il-Ġranet tal-Enerġija huma fattur ewlieni tal-EUSEW, li għandha l-għan li xxerred l-aħjar prattiki, tinspira ideat ġodda u tibni alleanzi li jgħinu biex jiffurmaw l-Unjoni tal-Enerġija tal-UE. Issa, fl-għaxar sena tagħha, l-EUSEW hija l-avveniment ewlieni tal-Ewropa għall-partijiet ikkonċernati kollha biex jesploraw l-aħjar modi kif jilħqu l-għanijiet tal-enerġija u tal-klima tal-UE. Organizzata bl-appoġġ tal-Aġenzija Eżekuttiva għall-Intrapriżi Żgħar u ta’ Daqs Medju (EASME) b’konsultazzjoni mal-Kummissjoni Ewropea, hija tikkonsisti f’ġimgħa ta’ attivitajiet iddedikati għall-effiċjenza enerġetika u għal soluzzjonijiet ta’ enerġija rinnovabbli fl-Ewropa.
Din is-sena, il-Konferenza dwar il-Politika li ssir kull sena fi Brussell, 16-18 ta’ Ġunju, tiffoka fuq ir-rwol ta’ konsumaturi responsabbli fl-Unjoni Ewropea l-ġdida. Bħala parti minnha, il-Premijiet għall-Enerġija Sostenibbli jirrikonoxxu l-aħjar proġetti tas-sena fil-qasam tal-effiċjenza tal-enerġija u soluzzjonijiet ta’ enerġija rinnovabbli. Ir-rebbieħa se jitħabbru matul ċerimonja fi Brussell fis-16 ta’ Ġunju minn Jerzy Buzek, li kien il-Prim Ministru tal-Polonja u li issa huwa l-kap tal-Kumitat tal-Parlament Ewropew għall-Industrija, ir-Riċerka u l-Enerġija (ITRE).
Miguel Arias Cañete, Il-Kummissarju tal-UE għall-Azzjoni dwar il-Klima u l-Enerġija, Maroš Šefčovič, il-Viċi-President tal-Kummissjoni Ewropea inkarigat mill-Unjoni tal-Enerġija, u dinjitarji oħra, se jkunu involuti wkoll biex jiġi ċċelebrat l-10 anniversarju tal-EUSEW bi stil.
Irreġistra għall-Konferenza tal- EUSEW dwar il-Politika qabel it-8 ta’ Ġunju!
Ikkonsulta l-programm tal-Konferenza għal iktar informazzjoni!